Kryeministri Edi Rama publikoi të shtunën pyetjen e katërt të formularit të Këshillimit Kombëtar, një nismë që synon marrjen e mendimit të qytetarëve mbi çështje me rëndësi strategjike për vendin, ekonominë, shoqërinë.

Pyetja e katërt e formularit ka të bëjë me me pagesën e kontributeve shoqërore nga ata që kanë fituar statusin e pensionistit, por që vazhdojnë ende të punojnë.

“Ka njerëz që thonë se ata që kanë fituar statusin e pensionistit, por që vazhdojnë ende të punojnë, nuk duhet të paguajnë kontributet shoqërore. Të tjerë mendojnë që nuk duhet bërë një diferencim i tillë. Si mendoni ju?”, është pyetja që shtrohet në formular.

Pyetja ka edhe një sqarim të çështjes ku thuhet se “pensionistët e kanë dhënë kontributin e tyre financiar gjatë gjithë viteve të punës deri në momentin e daljes në pension. Pas këtij momenti, nëse ata zgjedhin të vazhdojnë të punojnë, nuk kanë përse të vazhdojnë të paguajnë sigurimet shoqërore, përderisa detyrimin e tyre e kanë shlyer më parë”.

Qytetarët kanë tri mundësi për të kthyer përgjigje: Pensionistët që punojnë nuk duhet të paguajnë kontribute shoqërore; Nuk ka nevojë për këtë diferencim për pensionistët që punojnë; Nuk di të gjykoj mbi këtë çështje.

Rama theksoi se “me falënderimin e madh për 16.544 bashkëqytetarët e bashkëqytetaret, kudo ndodhen, që janë përfshirë deri mbrëmë në Këshillimin Kombëtar, duke e plotësuar pyetësorin online qysh në 24 orët e para, ju ftoj të gjithëve të bëheni pjesë e këtij kuvendimi popullor për çështje me rëndësi strategjike për Shtëpinë tonë Shqipërinë”.

Kush dëshiron mund të marrë pjesë duke klikuar në https://keshillimikombetar.al/”.

Në 5 janar të këtij viti, Kryeministri Rama njoftoi nisjen e procesit të Këshillimit Kombëtar, përmes të cilit qytetarët do të shprehin mendimin e tyre lidhur me çështje që kanë të bëjnë me ekonominë, punën, familjen, drejtësinë, luftën kundër kriminalitetit, apo procesin e integrimit evropian të vendit.