Pas apelit në RTSh Gjirokastra,  mbi gjëndjen e vështirë të familjes Peçaj në fshatin Kakodhiq , kjo e fundit,  në prag të festave të fundvitit është bërë me shtëpi të re. Një banesë e rikonstruktuar tërësisht me kushte bashkëkohore, është bërë e mundur nga bashkia e Gjirokastrës , duke mundësuar për katër anëtarët  një jetë si gjithë të tjerët.

Pas kësaj,  nisur dhe nga gjëndja ekonomike tejet e vështirë për familjen Peçaj, të ardhurat e të cilëve sigurohen  vetëm me anë të kempit të kryefamiljarit , bashkia e Gjirokastrës  mori vendimin për rikonstruksionin e banesës.

Kryefamiljarja  Ronela Peçaj shprehet se që prej ndërtimit të banesës jeta për ta ka ndryshuar .

“Ju falënderoj, për herë të parë do t’i bëjmë festat në një shtëpi të vërtet. Ne jetonim vetëm me kempin dhe s’kishim mundur kurrë të rregullonim as çatinë. Flinim në lagështi dhe në ato divane të vjetra, gjithmonë të dhëna. Ju jemi mirënjohës për të gjithë ndihmën që na dhatë si Televizion , të gjithë që ndihmuan familjen Pecaj,” thotë znj.Ronela.

Një vit më parë pas kronikës së transmetuar dhe apelit të të moshuarit,  për familjen u sensibilizuan disa biznese,  duke i ofruar kësaj të fundit  ndihma në bazë ushqimore dhe veshje, por kjo ishte e pamjaftueshme duke  parë  kushtet ku jetonin  dhe banesën tejet të rrënuar .