Vijon të ketë probleme me shpërndarjen e ndihmës ekonomike për muajin nëntor për përsonat me aftësi të kufizuara dhe shoqëruesit e tyre. Tashmë prej 1 jave  një pjesë e tyre i drejtohen Bashkisë Korçë për një sqarim të kësaj situatë sigurisht duke rrezikuar veten e tyre në këtë periudhë të vështirë pandemie. Ajo çfarë ata kërkojnë është një datë e përcaktuar në të cilën të shkojnë dhe të tërheqin ndihmën ekonomike dhe sipas tyre nuk është e arsyeshme që disa persona ta marrin ndihmën ekonomike më shpejt kur nevojat e tyre janë të njëjta pasi të gjithë nëpërmjet kësaj ndihme ekonomike ushqejnë familjen e tyre.

Nga ana tjetër, kontaktuar nga RTSh Korça burime pranë drejtorisë së Kujdesit Social Bashkia Korçë bëjnë me dije se të gjitha borderotë janë dorëzuar tek drejtoria e financave problemi qëndron tek mungesa e fondit. Po këto burime bëjnë me dije se fondi i çelur plotësonte vetëm një numër të caktuar përsonash të cilët kanë tërhequr ndihmën ekonomike, për pjesën tjetër janë duke pritur riçeljen e fondit i cili do t’i japë fund problemit të shpërndarjes së ndihmës ekonomike.