Roman Abramovich u jep fund thashethemeve të qarkulluara në orët e fundit dhe zyrtarizon synimin për të shitur Chelsea. Manjati rus, i cili ishte në shënjestër për miqësinë e tij me presidentin Vladimir Putin, lëshoi ​​një deklaratë duke njoftuar se ka udhëzuar ekipin e tij të krijojë një fondacion bamirësie, në të cilin do të dhurohen të gjitha të ardhurat neto nga shitja. Fondacioni do të jetë për përfitim të të gjitha viktimave të luftës në Ukrainë.

Flitet për një kërkesë prej 3.3 miliardë paund, gati 4 miliardë euro, për shitjen e klubit londinez të blerë në vitin 2003.

“Do të doja të trajtoja spekulimet që kanë qarkulluar në media ditët e fundit në lidhje me pronësinë time të Chelsea FC. Siç e thashë edhe më parë, vendimet i kam marrë gjithmonë në interes të klubit, prandaj në situatën aktuale kam marrë vendimin për ta shitur klubin, pasi besoj se kjo është në interesin më të mirë të klubit, tifozëve, punonjësve si dhe sponsorëve dhe partnerëve”.

“Shitja e Klubit nuk do të përshpejtohet por do të ndjekë një proces të rregullt. Unë nuk do të kërkoj asnjë kredi për të shlyer. Për mua nuk ka të bëjë kurrë me biznes apo para, por pasion të pastër për lojën dhe klubin. Përveç kësaj, kam porositur ekipin tim të krijojë një fondacion bamirësie të cilit do t’i dhurohen të gjitha të ardhurat neto nga shitja. Nga ky Fondacioni do të përfitojë të gjitha viktimat e luftës në Ukrainë. Kjo përfshin sigurimin e fondeve thelbësore për nevojat urgjente dhe të menjëhershme të viktimave, si dhe mbështetjen e punës afatgjatë të rimëkëmbjes”.

“Ju lutem ta dini se ky ka qenë një vendim tepër i vështirë për t’u marrë dhe më dhemb që të ndahem në këtë mënyrë. Megjithatë, besoj se kjo është në interesin më të mirë të klubit”.

“Shpresoj që të mund të vizitoj Stamford Bridge për herë të fundit për t’ju përshëndetur të gjithëve personalisht. Ka qenë një privilegj të jem pjesë e Chelsea FC dhe jam krenar për të gjitha arritjet tona. Klubi i futbollit Chelsea dhe tifozët e tij do të jenë gjithmonë në zemrën time”.