Flamurtari dhe Tirana kanë dhuruar një ndeshje me emocione dhe rivalitet në Ligën Unike në basketboll për femra. Këtë e tregon edhe rezultati i ngushtë, 66-63 në favorë të skuadrës vlonjate.

Rivalitet dhe emocione ka dhuruar ndeshja Flamurtari-Tirana në basketboll për femra, e vlefshme për Ligën Unike. Ashtu si gjithnjë, në historikun e sfidave të këtyre dy skuadrave, edhe këtë radhë, pritshmëritë nuk i kanë zhgënjyer tifozët në pallatin e sportit “Flamurtari”.

Këtë e tregon edhe rezultati, i cili vendosi ekipin fitues të kësaj ndeshjeje vetëm në sekondat e fundit. Rivaliteti është i dukshëm që në pjesën e parë, e cila mbyllet 22-21 për Flamurtarin. Në pjesën e dytë basketbollistet vlonjate luajnë më mirë se kundërshtari duke i mbyllur 20 minutat e para 38-33.

Krejt ndryshe ndodh pas pushimit. Eshtë Tirana që dominon duke përmbysur gjithçka në favorin e vet e duke i mbyllur 10 minutat e treta në avantazh 50-55. Fraksioni i fundit është shumë emocionues, kur basketbollistet e të dyja skuadrave kërkojnë të jenë sa më të sakta në veprimet e tyre.

Flamrutari ndryshon disi mënyrën e lojës së vet dhe është më i kujdesshëm në mbrojtje. Rivaliteti ruhet deri në sekondat e fundit, kur Myrto realizon për tri pikë dhe gjithçka mbyllet 66-63 për Flamurtarin.

Për skuadrën vlonjate kjo është fitorja e parë në Ligën Unike pas humbjes në Prizren ndaj Bashkimit, ndërsa Tirana regjistron humbjen e parë në dy ndeshje të luajtura.