Veprimtaria e dytë e futbollit në vend, Kupa e Shqipërisë, ka nisur të mërkurën me ngarkesë të plotë rrugëtimin e sezonit të ri të saj, me zhvillimin e ndeshjeve të para të turit të 32-shes. Në fakt, më herët janë luajtur edhe dy takimet e turit paraeliminator, prej nga Labëria dhe Luzi 2008 kanë fituar vendin në turin tjetër. Dhe turi i 32-shes, ndryshe nga sezoni i shkuar, ku, për shkak të epidemisë së virusit “Covid-19”, duelet u zhvilluan me një përballje të vetme, këtë sezon do të zhvillohen me sistem vajtje-ardhje. Midis ndeshjeve të para të çifteve të këtij turi, spikatën duelet midis skuadrave të Kategorisë së Parë, teksa ato të Kategorisë Superiore janë favorizuar nga shorti.

Fituesja në fuqi e këtij trofeu, Vllaznia, është shtangur nga skuadra modeste e Labërisë, duke u mundur me shifrat 1-2, ndërsa kampionia në fuqi, Teuta, është sfidohet në derbin rajonal nga Luzi 2008, por e ka mbyllur praktikisht kualifikimin që në takimin e parë, duke fituar thellë, 4-1. Nga skuadrat tjera të Superiores, Kastrioti ka mposhtur Elbasanin 2-0, ndërsa Egnatia e Rrogozhinës ka vuajtur për të marrë një barazim 1-1 në Cërrik përballë Turbinës, Kukësi është ndarë me rrjeta të paprekura përballë Maliqin, Laçi është ndarë me një barazim 1-1 në Sarandë me Butrintin dhe Dinamo është mundur minimalisht në Shijak përballë Erzenit.

Finalistja e mundur e sezonit të shkuar, Skënderbeu ka fituar 3-0 në Shkodër ndaj Veleçikut të Koplikut, ashtu sikundër ka bërë edhe Tirana në Peqin ndaj Shkumbinit, por edhe Partizani, që ka mundur 3-0 në Pukë Tërbunin. Ndërkaq, midis çifteve të tjera spikatin rezultatet e takimeve të parë të dueleve Besëlidhja e Lezhës-Burreli 0-0, Oriku-Bylisi 1-2, Vora-Korabi i Peshkopisë 2-1, Flamurtari-Apolonia 1-1, Lushnja-Tomori i Beratit 0-3 dhe Besa e Kavajës-Pogradeci 1-0. Ndërsa ndeshjet e kthimit të turit të 32-shes së Kupës së Shqipërisë luhen të enjten e 14 tetorit 2021.

Kupa e Shqipërisë

Turi i 32-shes:

Të mërkurën, 22 shtator 2021:

Tërbuni Pukë – Partizani Tirana   0-3

Shkumbini Peqin – Tirana            0-3

Veleçiku Koplik – Skënderbeu     0-3

Oriku – Bylis                                 1-2

Erzeni Shijak – Dinamo                1-0

Besëlidhja Lezhë – Burreli            0-0

Vora – Korabi Peshkopi               2-1

Butrinti Sarandë – Laçi                1-1

Maliqi – Kukësi                           0-0

Elbasani – Kastrioti                     0-2

Flamurtari – Apolonia                 1-1

Turbina Cërrik – Egnatia Rrogozhinë         1-1

Lushnja – Tomori Berat               0-3

Besa Kavajë – Pogradeci             1-0

Luzi 2008 – Teuta                        1-4

Labëria – Vllaznia                        2-1

Shënim:               Ndeshjet në vijim zhvillohen me sistem vajtje-ardhje.

                                Ndeshjet e kthimit luhen të enjten e 14 tetorit 2021