Sapo zbarkoi në Miami, ku iu bashkua shokëve të tij të rinj të Barcelonës, Robert Lewandowski deklaron: “Shumë i lumtur që jam këtu. Ishte e lehtë të vendosa të vija te Barça”, raporton faqja zyrtare e klubit katalanas.

“Barça është rikthyer. Mendoj se mund të ndihmoj që skuadra të kthehet në majat e futbollit europian. Ka qenë një ditë e gjatë. Shpresoj se do të fillojmë të fitojmë menjëherë. Më pëlqen të fitoj trofe dhe ky është një kapitull i ri për mua, me sfida të reja. Kjo është një mundësi e shkëlqyer për mua. Gjithmonë kam dashur të luaj në La Liga dhe për një skuadër të madhe. Unë kam folur tashmë me Xavi dhe i di idetë e tij. Ai ishte një lojtar i madh dhe e pret një e ardhme e madhe si trajner”, përfundoi sulmuesi polak, i cili përshëndeti Bayern pas tetë sezonesh, 19 trofe dhe 344 gola të shënuar në 375 ndeshje.

Tregu i transferimeve të Barcelonës nuk do të ndalet me blerjen e Robert Lewandowskit. Siç raporton Radio MARCA, katalanasit në orët e ardhshme duan të mbyllen edhe për mbrojtësin e Chelsea, Cesar Azpilicueta. Spanjolli vlerësohet në rreth tetë milionë euro, por Barça është e bindur se do të jetë në gjendje të gjejë një marrëveshje me shifra më të ulëta.