Pas një viti mungesë, Rafael Nadal rikthehet me një paraqitje më se bindëse, duke mposhtur në dy sete (7-5, 6-1) austriakun Dominic Thiem dhe duke u kualifikuar kështu në turin e dytë të turneut në Brisbane të Australisë.

Spanjolli, i ndalur nga problemet fizike që e detyruan t’i nënshtrohej një operacioni, kontrolloi një set të parë shumë të ekuilibruar dhe më pas të dytin e fitoi me lehtësi, falë rënies së energjive të kundërshtarit, në një ndeshje që zgjati më pak se një orë e gjysmë.

Me fitoren e tij të 1069-të, Nadal kaloi ish-numrin 1 të botës, Ivan Lendl në tabelën e liderëve të të gjitha kohërave. Vetëm Jimmy Connors (1274), Roger Federer (1251) dhe Novak Djokovic (1088) mbeten përpara spanjollit. Pas fitores, Rafael Nadal do të thoshte fjalët e para. 

“Pata rastin të kthehem pas një viti dhe të luaj përballë një publiku fantastik. Sinqerisht, sezoni i kaluar jashtë turneut ishte ndoshta viti më i keq i jetës sime. Para ndeshjes isha nervoz sepse nuk e dija se në çfarë gjendja isha. Mendoj se luajta mjaft mirë dhe dashuria e publikut më bën vërtetë të lumtur”.