Tenisti serb Novak Djokovic fitoi turneun Masters të Sinsinati, pas fitores 2-1 (1-6, 6-3, 6-4) ndaj kanadezit Milos Raonic në finale. Një ndeshje që zgjati dy orë dhe u zhvillua në Nju Jork, për shkak të masave që janë marrë aty prej koronavirus.

Për serbin ky është trofeu nr.80 në karrierën e tij, triumfi nr.35 në një turne Masters, duke barazuar rekordin e Nadal. Këtë vit, Djokovic nuk ka humbur ende asnjë ndeshje zyrtare, duke u rikthyer triumfues në fushë 5 muaj pas pushimit të detyruar nga pandemia e Covid-19.

Pas një starti shumë të keq të ndeshjes, fituar me lehtësi nga Raonic, tenisti serb arrin të rikuperojë dhe të përmbysë gjithçka në dy setet e tjera, duke e merituar fitoren dhe konsolidon kreun e renditjes botërore.

Për femra, trofeun e Sinsinati e fitoi tenistja bjelloruse Victoria Azarenka. Në fakt, finalja e femrave nuk u luajt, pasi rivalja e saj, tenistja japoneze Naomi Osaka, nuk zbriti në fushë si pasojë e një dëmtimi në gjurin e majtë. Për Azarenka ky është triufmi nr,26 në karrierë, i parë në një Masters që prej vitit 2016.