Tenisti serb Novak Djokovic është kualifikuar për në gjysmëfinalet e turneut Masters të Sinsinati. Numri 1 në botë për meshkuj mposhti 2-0 (6-3, 6-1) gjermanin Jan Lennard-Struff, në një ndeshje të dominuar dhe fituar me lehtësi nga serbi.

Përballjë Djokovic në gjysmëfinale do të jetë spanjolli Roberto Bautista Agut, që mposhti 2-1 (1-6, 6-4, 6-3) në çerekfinale rusin Daniil Medvedev, kampionin në fuqi.

Ndeshja tjetër gjysmëfinale e turneut Masters të Sinsinati është ajo mes grekut Stefanos Tsitsipas dhe kanadezit Milos Raonic. Greku u kualifikua pas tërheqjes së rivalit amerikan Reilly Opelka në fund të setit të parë, i dëmtuar. Ndërsa Raonic mposhti 2-1 në çerekfinalen e fundit serbin Filip Krajinovic.

Sot turneu do të jetë pushim, pas bojkotit që i bëri gjysmëfinales japonezja Naomi Osaka (ndaj Elise Mertens), që refuzoi të luajë si pasojë e protestave anti-racizëm. Organizatorët nuk e skualifikuan ish-numrin 1 në botë, por vendosën shtyrjen e sfidës. Gjysmëfinalja tjetër për femra është ajo mes Victoria Azarenka dhe Johanna Konta.