Një avion stërvitor i Forcave Ajrore të Bangladeshit është rrëzuar në një kampus shkolle në kryeqytetin Daka, duke shkaktuar vdekjen e të paktën 19 personave, përfshirë pilotin, dhe duke plagosur më shumë se 100 të tjerë. Aksidenti tragjik ndodhi të hënën pasdite, ndërsa nxënësit po ndiqnin mësimet.

Sipas ushtrisë, avioni F-7 BGI, i prodhuar në Kinë, u ngrit nga Baza Ajrore e Bangladeshit AK Khandaker në orën 13:06 sipas orës lokale. Pak pas ngritjes, ai “pësoi një mosfunksionim teknik”.

Piloti, togeri i fluturimit Md. Toukir Islam, bëri çdo përpjekje për ta devijuar avionin nga zonat e populluara drejt një vendi më pak të banuar, por fatkeqësisht avioni u përplas në një ndërtesë dykatëshe brenda kampusit të Shkollës dhe Kolegjit Milestone.

Shërbimi i Zjarrfikësve dhe Mbrojtja Civile konfirmuan se shumica e viktimave janë studentë. Në vendngjarje mbizotëronte një skenë dëshpërimi, me prindër të panikuar që nxitonin mes rrënojave ndërsa ekipet e shpëtimit dhe vullnetarët transportonin të plagosurit në spitale, duke përdorur çfarëdo mjeti që kishin në dispozicion. Mjekët raportuan se një numër i madh i të plagosurve kishin pësuar lëndime të rënda nga djegiet.

Për shkak të tragjedisë, qeveria e Bangladeshit shpalli një ditë zie kombëtare për të martën. Udhëheqësi i përkohshëm, Muhammad Yunus, premtoi një hetim të plotë për aksidentin, ndërsa kryeministri indian Narendra Modi shprehu ngushëllimet e tij dhe ofroi solidaritetin e Indisë.

Në vendngjarje, ushtarët dhe ekipet e shpëtimit vijuan kërkimet në rrënoja për të mbijetuar.

/rtsh.al/