Presidenti i Venezuelës, Nicolas Maduro, ka bërë të ditur se rreth dhjetë ditë më parë ka zhvilluar një bisedë telefonike me presidentin amerikan Donald Trump, në një moment kur tensionet mes dy vendeve janë rritur ndjeshëm. Ai tha në televizionin publik se biseda ishte “me respekt dhe e përzemërt”, ndërsa shtoi se një dialog i tillë mund të hapë rrugën për marrëdhënie më të qeta.

Maduro theksoi se po kërkon “dialog të respektueshëm, shtet me shtet”, duke nënvizuar se Venezuela kërkon paqe dhe diplomaci, jo përplasje. Ndërkohë, presidenti Trump konfirmoi shkurtimisht komunikimin, duke thënë se “i tregoi disa gjëra” Maduros, por mohoi se ka pasur një telefonatë të dytë.

Biseda vjen në një kohë kur SHBA ka ashpërsuar presionin ndaj Venezuelës, duke vendosur trupa në Karaibe dhe duke goditur anije që Uashingtoni i konsideron si transportuese të drogës. Maduro tha se telefonata erdhi drejtpërdrejt nga Shtëpia e Bardhë dhe kërkoi “maturi diplomatike”, duke theksuar se negociatat serioze duhen zhvilluar larg mikrofonëve. Ai përsëriti në anglisht se vendi i tij dëshiron diplomaci dhe “kurrë luftë”.

Trump e akuzon qeverinë venezueliane për trafik droge, ndërsa Maduro e cilëson këtë një justifikim për ndryshim regjimi dhe kontroll të naftës. Paqartësitë u shtuan kur në Karakas mbërriti një avion me 266 emigrantë të deportuar nga SHBA-ja, pavarësisht deklaratave të Trump se hapësira ajrore venezueliane ishte “e mbyllur”.

Autoritetet venezueliane thanë se SHBA kërkoi vetë fluturimin disa ditë më parë dhe se Maduro e miratoi menjëherë. Ky është fluturimi i 76-të i riatdhesimit nga SHBA, ndërsa numri total i të rikthyerve këtë vit ka kaluar 18 mijë persona.

Gazetar: A. Mata

/rtsh.al/