Forca Tokësore, kolona vertebrale e ushtrisë shqiptare, ka shënuar një moment të rëndësishëm të tranzicionit të saj drejtues. Gjatë ceremonisë së ndërrimit të komandës, Ministri i Mbrojtjes, Pirro Vengu, theksoi se ky proces është dëshmi e stabilitetit dhe profesionalizmit të Forcave të Armatosura në rrugëtimin e tyre drejt standardeve më të larta të NATO-s.

Në një mesazh drejtuar trupave dhe opinionit publik, Ministri Vengu u shpreh se kalimi i detyrës nga një gjeneral te tjetri nuk duhet parë si një akt thjesht formal, por si një stafetë përgjegjësie për sigurinë e Republikës.

“Përgjegjësia për mbrojtjen e Republikës nuk ndërpritet, por kalon nga një dorë e sprovuar te një tjetër. Çdo komandant ndërton mbi punën e paraardhësit,” deklaroi Vengu.

Nderime për Gjeneral Xhebexhia, suksese Gjeneral Çunit

Ceremonia shënoi mbylljen e një kapitulli të rëndësishëm nën drejtimin e gjeneralmajor Ilir Xhebexhia, i cili u falënderua për shërbimin dhe kontributin e tij në rritjen e kapaciteteve operacionale të forcës.

Ministri Vengu e mbylli mesazhin e tij duke rikonfirmuar se rritja profesionale e Forcës Tokësore është jetike për sigurinë e vendit. Sipas tij, synimi mbetet i qartë: një forcë që bëhet çdo ditë e më profesionale dhe një pikë referimi për besueshmërinë tonë përballë aleatëve.

/rtsh.al/