Në kuadër të Muajit të Pyllëzimit, dhjetëra fidanë pishe janë mbjellë së fundmi përgjatë brigjeve të lumit Buna.

Aksioni u organizua nga shoqata mjedisore “Eko Mendje”, me pjesëmarrjen e dhjetëra të rinjve, dhe u përqendrua në një nga zonat më të rrezikuara nga erozioni.

Drejtuesi i “Eko Mendje”, Mirsad Basha, u shpreh, “Ishte një aktivitet ku u mbollën rreth 60 fidane pishe. Kjo iniciativë u mor me banorët e zonës sepse ata e njohin territorin dhe janë më të prekur nga kjo dukuri.”

Përveç brigjeve të Bunës, aksioni i pyllëzimit do të vijojë gjatë muajit dhjetor edhe në zona të tjera të Bashkisë Shkodër.

“Gjatë monitorimit që i bëmë lumit, deri në grykëderdhjen e Bunës, kemi evidentuar disa zona që kanë pasur erozione dhe shkarje dheu. Shpresoj që të bëjmë një aksion për mbjelljen e 2 mijë fidanëve, ashtu sikurse e kemi parashikuar.”

Nisma synon jo vetëm përmirësimin e gjendjes mjedisore, por edhe ndërgjegjësimin e komunitetit për rëndësinë e ruajtjes së ekosistemeve natyrore dhe parandalimin e degradimit të tokës.

Gazetar: A. Hoti

/rtsh.al/