Policia e Tiranës ka vijuar kontrollet në kuadër të operacionit policor të koduar “Fireworks”, duke goditur një tjetër rast të tregtimit të paligjshëm të lëndëve piroteknike në prag të festave të fundvitit.

Shërbimet e Komisariatit Nr. 1 kanë arrestuar në flagrancë shtetasin S. M., 22 vjeç, i cili u kap duke transportuar me automjet pako me fishekzjarre dhe kapsolla të dyshuara kontrabandë, me qëllim shitjen e tyre.

Arrestimi u bë në bulevardin “Bajram Curri”, ku agjentët e policisë ndaluan për kontroll automjetin që drejtonte i riu.

“Nga kontrolli në automjet u gjetën pako me lëndë piroteknike (fishekzjarre dhe kapsolla) që do të shiteshin në kundërshtim me kriteret. Gjithashtu, 22-vjeçari nuk dispononte fatura blerjeje për këto mallra,” sqaron Policia e Tiranës në njoftimin zyrtar.

Në cilësinë e provës materiale u sekuestruan sasitë e lëndëve piroteknike, si dhe automjeti që shërbente për transportin e tyre.

Ndaj 22-vjeçarit rëndojnë tashmë tri vepra penale: “Tregtimi dhe transportimi i mallrave që janë kontrabandë”, “Ruajtja ose depozitimi i mallrave kontrabandë” dhe “Shkelja e rregullave mbi lëndët plasëse dhe djegëse”.

Materialet i kanë kaluar Prokurorisë së Tiranës për veprime të mëtejshme, ndërsa policia paralajmëron se kontrollet do të vijojnë për të garantuar sigurinë e qytetarëve gjatë festimeve.

/rtsh.al/