Kancelari gjerman Friedrich Merz ka deklaruar se regjimi iranian po jeton ditët e fundit të tij, duke iu referuar protestave masive në Iran që kanë shkaktuar qindra të vdekur.

Sipas deklaratës së tij të bërë sot gjatë vizitës në Indi (në Bengaluru), Merz tha se “kur një regjim mbahet në pushtet vetëm me dhunë, atëherë ai është efektivisht i mbaruar. Unë besoj se po dëshmojmë ditët dhe javët e fundit të këtij regjimi.”

Ai theksoi se regjimi nuk ka më legjitimitet nga populli, pasi protestat janë përhapur në të gjithë vendin dhe njerëzit po ngrihen kundër tij.

Merz shprehu shpresën për një zgjidhje paqësore të konfliktit dhe tha se Gjermania, së bashku me SHBA-në, Britaninë e Madhe dhe Francën, po diskutojnë për të mbështetur një tranzicion paqësor drejt një qeverie të legjitimuar demokratikisht.

Deklarata e Merzit vjen në mes të protestave të mëdha në Iran, të cilat kanë hyrë në javën e tretë, ku raportohet për shtypje brutale nga forcat e sigurisë (përfshirë Gardën Revolucionare).

Deri më tani viktimat raportohen të kenë arritur qindra, ndërsa autoritetet iraniane kanë vendosur ndërprerje të gjata të internetit.

Merz e ka dënuar më herët dhunën duke e cilësuar atë brutale, ndërsa e ka konsideruar shenjë dobësie të regjimit.

Gjermania po mendon për sanksione më të ashpra, përfshirë listimin e Gardës Revolucionare si organizatë terroriste në BE.

/rtsh.al/