Transporti në Shqipëri po lëviz me dy shpejtësi të kundërta. Ndërsa aeroportet gumëzhijnë nga miliona udhëtarë, stacionet e trenave kanë mbetur pothuajse të braktisura.

Instituti i Statistikave (INSTAT) publikoi raportin për Tremujorin e katërt të vitit 2025, i cili konfirmon hendekun drastik midis transportit ajror dhe atij hekurudhor.

Bumi i linjave ajrore

Sipas të dhënave zyrtare, gjatë muajve tetor-dhjetor 2025, përmes linjave ajrore kanë udhëtuar 2,611,748 pasagjerë. Kjo shënon një rritje prej 9.5% krahasuar me të njëjtën periudhë të vitit të kaluar. Në treg kanë operuar 28 shoqëri ajrore (27 të huaja dhe 1 shqiptare), ndërsa volumi i mallrave të transportuara me ajër ka pësuar gjithashtu një rritje dyshifrore prej 18.9%.

Hekurudha, drejt fundit të epokës për udhëtarët

 Panorama paraqitet krejtësisht ndryshe për transportin hekurudhor. Statistikat tregojnë një situatë dramatike: gjatë gjithë tremujorit të katërt, trenat janë përdorur nga vetëm 178 pasagjerë në total. Kjo shifër përfaqëson një rënie prej 73.3% krahasuar me vitin 2024, duke e kthyer transportin e udhëtarëve me tren në një shërbim pothuajse inekzistent.

Bie edhe transporti i mallrave me tren

Kriza ka prekur edhe transportin e mallrave në shina. Volumi i mallrave zbriti në 98.9 mijë ton, duke shënuar një rënie prej 26%. Aktualisht, hekurudha shqiptare shërben kryesisht për industrinë e rëndë. Sipas INSTAT, 93.6% e mallrave të transportuara përbëhen nga qymyr, naftë bruto dhe gaz natyror, ndërsa rrjeti aktiv në shfrytëzim ka mbetur vetëm 253 km.

Raporti i INSTAT evidenton qartë se ndërsa shqiptarët dhe të huajt po zgjedhin masivisht avionin për të lëvizur, hekurudha ka mbetur një mjet transporti që i përket së shkuarës, ose përdoret ekskluzivisht për lëndë të para industriale.

/rtsh.al/