Kryeministri Edi Rama ka publikuar sot fotoalbumin tradicional të javës, duke sjellë në vëmendje momentet kryesore të agjendës së tij, e cila këtë herë u dominua nga vizita e rëndësishme diplomatike në Izrael dhe angazhimet e brendshme ekonomike.

Vizita në Izrael dhe nderimet në “Nova Site”

Pjesën më të rëndësishme të javës e zuri vizita zyrtare në Izrael, në kuadër të Konferencës Ndërkombëtare për Luftën kundër Antisemitizmit. I shoqëruar nga bashkëshortja, Linda Rama, dhe delegacioni zyrtar, Kryeministri zhvilloi një sërë takimesh të nivelit të lartë.

Ndalesa e parë ishte në “Nova Site”, vendi simbolik i tragjedisë së 7 tetorit 2023, i kthyer tashmë në një hapësirë reflektimi. Më pas, kreu i qeverisë u prit në takim nga homologu izraelit, Benjamin Netanyahu.

Një moment i veçantë ishte pritja me ceremoni të posaçme në “Knesset Plaza” nga Kryetari i Parlamentit të Izraelit, Amir Ohana, ku Rama iu adresua me një fjalim ligjvënësve izraelitë.

Ekonomi, nisja e “Export ON”

Pas kthimit në atdhe, fokusi u zhvendos te ekonomia. Rama mori pjesë në aktivitetin e Agjencisë Shqiptare të Zhvillimit të Investimeve (AIDA), ku u prezantua platforma e re digjitale “Export ON”.

Kjo platformë synon monitorimin në kohë reale të indikatorëve të punës së kompanive eksportuese dhe do të shërbejë për publikimin e raporteve vjetore mbi lëvizjen e volumeve tregtare, duke synuar rritjen e transparencës dhe mbështetjen ndaj biznesit.

Bujqësia dhe projektet e reja

Agjenda e javës përfshiu edhe një dëgjesë publike me fermerët në Divjakë, e fokusuar te “Skema Kombëtare 2026”. Gjatë bashkëbisedimit, Kryeministri theksoi nevojën që fermerët të orientohen drejt mundësive të pashfrytëzuara të financimit për të rritur prodhimin dhe standardet.

Në rrafshin urbanistik dhe kulturor, Rama ishte i pranishëm në përzgjedhjen e projekteve fituese arkitekturore për “Shtëpinë e Fëmijëve” dhe “Kompleksin e Inspektorateve Shtetërore”. Gjithashtu, ai vizitoi ekspozitën “Spaces in Dialogue” në Qendrën për Hapje dhe Dialog (COD), një instalacion që ndërthur arkitekturën me kujtesën njerëzore.

/rtsh.al/