Viti 2026 ka nisur me sfida të mëdha për Presidentin Donald Trump. Pavarësisht deklaratave të administratës për suksese ekonomike, sondazhet më të fundit tregojnë një realitet krejt tjetër: amerikanët janë gjithnjë e më të frustruar me koston e jetesës, politikat agresive të imigracionit dhe përqendrimin e Presidentit në çështje të jashtme të diskutueshme, si blerja e Groenlandës.

Sipas një analize të agjencisë “Associated Press” dhe sondazheve nga AP-NORC, Fox News dhe New York Times, pakënaqësia ka filluar të prekë edhe bazën besnike të Partisë Republikane.

Ekonomia, shqetësimi kryesor

Edhe pse Trump u rizgjodh duke premtuar rimëkëmbje ekonomike, qytetarët nuk po e ndiejnë ndryshimin në xhepat e tyre. Një sondazh i fundit i “New York Times” zbuloi se rreth gjysma e votuesve të regjistruar shprehen se politikat e Trump e kanë bërë jetën “më pak të përballueshme”.

Shifrat janë edhe më pesimiste në sondazhin e “Fox News”, ku 7 në 10 votues – përfshirë gjysmën e republikanëve – mendojnë se Presidenti nuk po i kushton vëmendjen e duhur ekonomisë. Vetëm 20% e të anketuarve shprehen se politikat e tij i kanë ndihmuar personalisht, ndërsa 45% presin që ekonomia të përkeqësohet gjatë vitit të ardhshëm.

Taktikat e imigracionit kthehen në bumerang

Imigracioni, dikur kali i betejës së Trumpit, po kthehet në një pikë të dobët. Mbështetja për mënyrën se si ai po menaxhon këtë çështje ka rënë në 38%, nga 49% që ishte në mars të vitit të kaluar.

Sipas sondazheve, 6 në 10 votues i konsiderojnë taktikat e agjencisë ICE si “shumë agresive” dhe se “kanë shkuar tepër larg”. Kjo rënie e mbështetjes vjen pas incidenteve të rënda në Minneapolis, përfshirë vrasjen e qytetares Renee Good nga një oficer i ICE, ngjarje që ka rritur zemëratën e publikut. Edhe mes republikanëve, mbështetja për politikat e tij të imigracionit ka rënë nga 88% në 76%.

Politika e jashtme dhe “fiksimi” me Groenlandën

Në vend që të fokusohet te problemet e brendshme, Trump është kritikuar për shpenzimin e energjive në çështje jopopullore të politikës së jashtme, si ideja për blerjen e Groenlandës apo tensionet me Venezuelën dhe Iranin.

Sondazhet tregojnë se 60% e amerikanëve e kundërshtojnë idenë e blerjes së Groenlandës. Rreth 40% e votuesve kërkojnë që Presidenti të angazhohet më pak në politikën e jashtme dhe të kthejë sytë nga problemet e brendshme të SHBA-së.

Lëkundet besimi i Republikanëve

Treguesi më alarmues për administratën është zbehja e entuziazmit brenda vetë Partisë Republikane. Një sondazh i “Pew Research Center” tregon se vetëm 56% e republikanëve mbështesin tashmë “shumicën ose të gjitha” planet e Trump, një rënie nga 67% që ishte në fillim të mandatit të dytë.

Gjithashtu, besimi te etika dhe aftësia e tij mendore ka pësuar rënie. Vetëm rreth 40% e republikanëve tani janë “shumë të sigurt” se Trump vepron në mënyrë etike (nga 55% vitin e kaluar), ndërsa besimi për gjendjen e tij mendore ka rënë nën 70%.

/rtsh.al/