Pas ndërhyrjeve emergjente për stabilizimin e trupit të rrugës, aksi nacional Librazhd-Pogradec do të jetë sërish i hapur për qarkullimin e automjeteve duke nisur nga dita e nesërme, në orën 12:00. Njoftimi zyrtar u bë nga Drejtori i Autoritetit Rrugor Shqiptar (ARRSH), Ami Kozeli, i cili theksoi se segmenti problematik do të jetë i aksesueshëm për të gjitha kategoritë e mjeteve.

Ndërhyrja emergjente dhe testimi i sigurisë

Bllokimi i rrugës në zonën e njohur si “Arrat e Gurrës” solli angazhimin e menjëhershëm të ekipeve të terrenit. Sipas kreut të ARRSH-së, “puna ka vijuar pandërprerë me një numër të shtuar mjetesh të rënda dhe punëtorësh”. Gjatë kësaj periudhe, është realizuar me sukses lehtësimi i masës së dheut të rrëshqitur, stabilizimi i trupit të rrugës dhe, paralelisht, devijimi i rrjedhës së lumit Shkumbin, me qëllim shmangien e gërryerjeve dhe dëmtimeve të mëtejshme të infrastrukturës.

Për t’u garantuar siguria e plotë e qytetarëve para hapjes së trafikut, segmenti i riparuar i është nënshtruar një prove teknike rigoroze.

“Prej katër ditësh segmenti është mbajtur në testim nën presion të vazhdueshëm me mjete të rënda dhe nuk ka shfaqur asnjë lloj cedimi,” deklaroi Kozeli, duke konfirmuar qëndrueshmërinë e aksit për të përballuar fluksin normal të automjeteve.

Projekti për zgjidhjen afatgjatë

Megjithëse hapja e rrugës siguron rifillimin e qarkullimit jetik drejt juglindjes së vendit, ndërhyrja e deritanishme përbën vetëm një zgjidhje emergjente. Autoriteti Rrugor Shqiptar ka bërë të ditur detajet e planit për një zgjidhje definitive, e cila konsiston në ndërtimin e një rruge të re alternative.

Sipas të dhënave të bëra publike, ky projekt do të kërkojë të paktën 60 ditë punë për t’u përfunduar. Rruga e re do të ketë një gjatësi prej 1.1 kilometrash dhe do të ndërtohet mbi lumin Shkumbin, në krah të linjës ekzistuese hekurudhore. Për realizimin e saj parashikohen vëllime të konsiderueshme inxhinierike, ku përfshihen rreth 80 mijë metra kub mbushje për formimin e trupit të ri të rrugës, shtrimi i 2,800 tonëve shtresë asfaltike.

Deri në përfundimin e këtij bypass-i të ri, qarkullimi do të vijojë normalisht në segmentin e stabilizuar, duke lehtësuar kështu lëvizjen e mallrave dhe udhëtarëve drejt qarkut të Korçës dhe pikave kufitare me vendet fqinje.

/rtsh.al/