Agjencia e Mbikëqyrjes Policore, rajoni Elbasan-Korçë, ekzekutoi vendimin e Gjykatës së Shkallës së Parë të Juridiksionit të Përgjithshëm Elbasan, e cila ka caktuar masat e sigurisë “Pezullim i ushtrimit të një detyre a shërbimi publik”, “Ndalimi i daljes jashtë shtetit” dhe “Detyrim për tu paraqitur në policinë gjyqësore”, ndaj një punonjësi policie.

Sipas AMP-së, është pezulluar nga detyra, inspektor E. K., me detyrë Oficer i Patrullës së Përgjithshme pranë DVP Elbasan, i dyshuar për kryerjen e veprave penale “Shpërdorim i detyrës” dhe “Përkrahje e autorit në krim”.

AMP njoftoi se caktimi i masave të sigurisë u bë i mundur në kuadër të procedimit penal të vitin 2025, ku nga hetimet e zhvilluara me metoda speciale ka rezultuar se punonjësi i policisë duke shpërdoruar detyrën ka përkrahur persona me precedent penal në aktivitetin e tyre të kundërligjshëm.

“Vijojnë hetimet për dokumentimin e plotë të kësaj veprimtarie të kundërligjshme si dhe identifikimin e personave të tjerë të mundshëm të përfshirë”, njoftoi AMP.

/rtsh.al/