Shefja e Stafit të Shtëpisë së Bardhë, Susie Wiles, është diagnostikuar me kancer të gjirit në fazë të hershme. Lajmi u bë i ditur të hënën nga vetë Presidenti i SHBA-së, Donald Trump, i cili theksoi se pavarësisht nisjes së menjëhershme të trajtimit, një nga këshilltaret e tij më të ngushta pritet të vazhdojë normalisht punën e saj.

Përmes një postimi në rrjetin e tij social Truth Social, Presidenti Trump u shpreh mjaft optimist për shëndetin e 68-vjeçares, duke e përshkruar atë si “një nga njerëzit më të fortë” që ai njeh. Ai rikonfirmoi se Wiles nuk ka ndërmend të japë dorëheqjen.

“Gjatë periudhës së trajtimit, ajo do të kalojë praktikisht gjithë kohën në Shtëpinë e Bardhë, gjë që më bën mua, si President, shumë të lumtur!” shkroi Trump, duke shtuar se bashkë me Zonjën e Parë, Melania Trump, i ofrojnë mbështetje të plotë. “Ajo së shpejti do të jetë më mirë se kurrë!”

Kush është Susie Wiles?

Susie Wiles ka hyrë në histori si e para grua që mban postin e fuqishëm të Shefes së Stafit në Shtëpinë e Bardhë. Ajo është një aleate e hershme dhe besnike e Donald Trump, e cila ka shërbyer për dekada si lobiste dhe stratege politike në Florida, duke pasur një rol kyç në fitoren e tij në këtë shtet në vitin 2016.

Ndonëse njihet si një figurë që preferon të qëndrojë në prapaskenë, Wiles tërhoqi vëmendjen e mediave në dhjetor të vitit të kaluar. Në një intervistë të rrallë dhe të sinqertë për Vanity Fair, ajo lëshoi kritika ndaj disa prej figurave më të larta të administratës, përfshirë Zëvendëspresidentin JD Vance dhe Prokuroren e Përgjithshme Pam Bondi. Pavarësisht bujës, Trump i doli menjëherë në mbrojtje, duke e cilësuar intervistën si një “hit” dhe duke rikonfirmuar besimin absolut tek ajo.

Një moment delikat për Shtëpinë e Bardhë

Lajmi për betejën shëndetësore të njeriut kryesor të stafit presidencial vjen në një periudhë me ngarkesë të jashtëzakonshme për administratën republikane. Trump aktualisht po përballet me sfida të mëdha në disa fronte si menaxhimi i luftës së vazhdueshme me Iranin dhe pasojat globale, përfshirë rritjen e çmimeve të naftës; shqetësimet në rritje të amerikanëve për koston e jetesës dhe përballueshmërinë e çmimeve, në një ekonomi që po tregon shenja vështirësie në fillim të vitit 2026; përgatitjet për zgjedhjet e rëndësishme të mesit të mandatit (midterms) që pritet të mbahen këtë vjeshtë, ku republikanët do të testojnë mbështetjen e tyre në Kongres.

/rtsh.al/