Avokati Besar Logu ka deklaruar në emisionin “3D” të Alban Dudushit në RTSH1 se vendimi i Gjykatës së Lartë nuk është risi dhe se masat e sigurisë varen nga vepra dhe individi.

Sipas tij, nëse i referohemi vendimit të sotëm njësues “tre janë pikat kryesore: Arsyetimi i masave të tjera – pra pse nuk janë të përshtatshme masat e tjera; Individualizimi i masës që ka të bëjë me personin, me subjektin dhe barra e provës”.

“Vendimi i sotëm njësues i Kolegjit të Bashkuar të Gjykatës së Lartë nuk është se ka sjellë ndonjë risi që vlen të kemi një fokus kaq të madh.

Pa diskutim ka ndryshuar vendimin numër 7 të 2011-s dhe e ka përafruar atë me disa ndryshime që janë bërë në vitin 2017 në kuadër të reformës në drejtësi, ku u prek edhe Kodi i Procedurës Penale. Konkretisht, në nenin 245 pika germë ç, ku detyrohet gjykata, është neni që bën rregullimin e vendimit të gjykatës. Çfarë duhet të bëjë gjykata kur vendos për një masë sigurimi? Në vendim duhet të parashtrojë faktet, provat, dispozitat që janë shkelur dhe të arsyetojë papërshtatshmërinë e masave të tjera.

Këtë vendim njësues (vendim unifikues quhej atëherë) e ka ndryshuar terminologjinë me reformën në drejtësi. Ai vendim unifikues u përafrua sot me atë që parashikon Kodi i Procedurës Penale. Po ta marrim në vetvete vendimin e sotëm njësues, tre janë pikat kryesore: Arsyetimi i masave të tjera – pra pse nuk janë të përshtatshme masat e tjera; Individualizimi i masës që ka të bëjë me personin, me subjektin dhe barra e provës”, u shpreh Logu.

Avokat Logu theksoi më tej se barra e provës ishte rregulluar edhe më parë.

“Pra kemi pasur një rregullim. Arsyetimin e masave të tjera e kishte edhe Kodi i Procedurës Penale. Barrën e provës që thotë sot, ne e kishim të rregulluar në nenin 246 pika 6, ku çdo gjashtë muaj prokuroria ka detyrimin të informojë gjykatën me ecurinë e hetimeve, me nevojat e sigurimit dhe sa e vlefshme është akoma qëndrimi në këtë masë.

Pse? Sepse unë mund ta kem arrestuar dikë, por rezulton që ai nuk ka lidhje, nuk është i përfshirë, që ta mbajnë atë në arrest me burg. Pra ka qenë rregullim edhe më parë” , nënvizoi më tej Logu.

/rtsh.al/