Qytetarë të ndryshëm kanë protestuar paralelisht në Tiranë dhe në disa qytete të vendit, konkretisht në Pogradec dhe Gjirokastër  duke shprehur kundërshtimin ndaj ndërtimeve në zonën e Zvërnecit dhe në zonat e tjera të mbrojtura natyrore.

Në Gjirokastër, protesta ka nisur prej orës 18:00. Qytetarët u mblodhën fillimisht në sheshin “Çerçiz Topulli” dhe më pas marshuan drejt zonës së pazarit karakteristik të qytetit.

Në Pogradec, sot shënon ditën e parë të pjesëmarrjes në protestat masive. Qytetarët u mblodhën në sheshin e kinemasë së qytetit, duke iu bashkuar thirrjeve për mbrojtjen e ekosistemeve të ndjeshme.

Protestat në Tiranë, që po vazhdojnë prej disa ditësh, janë shoqëruar me marshime drejt institucioneve qendrore, thirrje si “Shqipëria e shqiptarëve”, “Atdheu nuk është në shitje” dhe “Anuloni projektin”. Qytetarët kërkojnë ndalimin e menjëhershëm të projekteve të ndërtimit që prekin zonat e mbrojtura, veçanërisht në Zvërnec, ku shqetësimet mjedisore janë të mëdha.

Protestat të cilat nisën në Zvërnec kundër ndërtimeve atje u përhapën në Tiranë dhe ditët e fundit në qytetet e tjera të vendit, ku qytetarët theksojnë nevojën për ruajtjen e mjedisit, trashëgimisë natyrore dhe respektimin e ligjeve për zonat e mbrojtura.

/rtsh.al/