Gjykata e Apelit në Kaliforni ka lënë në fuqi vendimin e vitit 2022, i cili e shpall fajtor ish-manjatin e Hollivudit, Harvey Weinstein, për përdhunim dhe sulm seksual. Megjithatë, trupi gjykues ka anuluar masën e dënimit me 16 vjet burg, duke urdhëruar një gjyqtar të shkallës së parë që të rishqyrtojë dhe të japë një dënim të ri.

Ky zhvillim vjen si një moment i rëndësishëm në sagën e gjatë ligjore të Weinstein, rasti i të cilit shërbeu si katalizator për lëvizjen globale kundër ngacmimeve seksuale, #MeToo.

Në një vendim unanim, paneli i përbërë nga tre gjyqtarë të Gjykatës së Apelit të Qarkut të 2-të të Kalifornisë doli në përfundimin se gjyqtari i shkallës së parë nuk i kishte shkelur të drejtat kushtetuese të të akuzuarit gjatë procesit. Ata hodhën poshtë përpjekjet e mbrojtjes për të prishur vendimet e jurisë mbi fajësinë e Weinstein për sulmet ndaj një modeleje dhe aktoreje italiane.

“Ne i hedhim poshtë përpjekjet e tij për të prishur vendimet e jurisë për fajësi. Dënimi anulohet dhe çështja kthehet për rigjykim. Në të gjitha aspektet e tjera, vendimi konfirmohet,” theksohet në përditësimin zyrtar të gjykatës.

Arsyeja e anulimit të masës së dënimit bazohet në faktin se gjyqtari i mëparshëm kishte marrë në konsideratë, si faktor rëndues, dënimet e Weinstein në Nju Jork. Duke qenë se këto dënime të Nju Jorkut u rrëzuan më vonë, Apeli e pa të nevojshme rishikimin e viteve të burgut, një qëndrim me të cilin u pajtua edhe Prokurori i Përgjithshëm i Kalifornisë.

Reagimi i mbrojtjes dhe hapat e ardhshëm

Ekipi ligjor i Weinstein, i cili aktualisht është 74 vjeç dhe po mbahet në paraburgim në Nju Jork në pritje të një dënimi tjetër, paralajmëroi se do ta dërgojë çështjen në Gjykatën Supreme të Kalifornisë.

Në një prononcim për agjencinë Associated Press (AP), zëdhënësi i tij, Juda Engelmayer, theksoi mosdakordësinë me vendimin:

“Jemi të zhgënjyer nga vendimi i sotëm dhe me respekt nuk pajtohemi me përfundimet e Gjykatës së Apelit në lidhje me drejtësinë e gjyqit të z. Weinstein. Ky nuk është fundi i procesit të apelit.”

Zhvillimet paralele në Nju Jork

Vendimi në Kaliforni u shpall vetëm një ditë pasi prokurorët në Nju Jork morën vendimin për të mos kërkuar një gjyq të katërt kundër tij për akuzat e vjetra. Prokurori i Distriktit të Manhattanit, Alvin Bragg, bëri me dije se akuzuesja kryesore, e cila kishte dëshmuar tashmë para disa jurive, nuk ishte e gatshme të përballej sërish me traumën e dëshmisë në sallën e gjyqit.

Rënia e Weinstein filloi pas hetimeve shokuese nga The New York Times dhe The New Yorker, ku mbi 80 gra e akuzuan atë për sjellje abuzive, duke i dhënë zë lëvizjes globale kundër shfrytëzimit të grave në industrinë e argëtimit.

Pavarësisht heqjes dorë nga gjyqi i katërt në Nju Jork, Weinstein pret në muajin shtator një dënim të ri atje për një krim tjetër seksual, ku prokuroria ka kërkuar deri në 20 vjet burg.

Sipas procedurave, ai do të nisë vuajtjen e dënimit të ri në Kaliforni vetëm pas përfundimit të dënimit që do t’i jepet në shtetin e Nju Jorkut.

Weinstein ka mohuar vazhdimisht të gjitha akuzat, duke pretenduar se marrëdhëniet kanë qenë konsensuale.

/rtsh.al/