Policia e Lezhës ka ushtruar kontrolle në zonën turistike të Shëngjinit për monitorimin e nivelit të zhurmave dhe garantimin e qetësisë publike gjatë sezonit veror.

Në kuadër të masave parandaluese, efektivët e policisë kanë zhvilluar takime informuese me administratorë subjektesh dhe persona fizikë, aktiviteti i të cilëve shoqërohet me muzikë dhe gjenerim zhurmash, kryesisht në zonat turistike.

Kontrollet janë kryer bazuar në hartëzimin e zonave me ndotje akustike, ku me anë të matësve të zhurmës janë verifikuar ambiente të hapura dhe të mbyllura në Shëngjin.

Sipas Policisë, matjet e kryera në përputhje me procedurat standarde kanë rezultuar brenda niveleve të lejuara, ndërsa nuk janë konstatuar tejkalime të kufijve të përcaktuar.

Krahas monitorimit të zhurmave, strukturat e Policisë kanë kontrolluar edhe respektimin e orarit të lejuar për muzikën në ambiente të hapura në zona të banuara, i cili është nga ora 11:00 deri në 24:00.

Policia e Lezhës bën me dije se kontrollet do të vijojnë gjatë gjithë sezonit turistik, me qëllim garantimin e sigurisë publike dhe respektimin e rregullave nga subjektet që ushtrojnë aktivitet në zonat turistike.

/rtsh.al/