Ish-emisari amerikan për dialogun Kosovë–Serbi, Richard Grenell, ka reaguar pas aktgjykimit të Dhomave të Specializuara në Hagë ndaj ish-presidentit të Kosovës, Hashim Thaçi, duke e cilësuar dënimin e tij si “skandaloz” dhe duke bërë thirrje për shpërbërjen e Gjykatës Speciale.

Thaçi është dënuar me 25 vjet burgim. Me të njëjtin aktgjykim, Jakup Krasniqi është dënuar me 25 vjet, Kadri Veseli me 18 vjet, ndërsa Rexhep Selimi me 13 vjet burgim.

Në reagimin e tij pas shpalljes së aktgjykimit, Grenell ka kritikuar ashpër vendimin ndaj Thaçit.

“Dënimi i shpallur nga Gjykata e Hagës ndaj Hashim Thaçit, për një luftë të 25 vjetëve më parë, është skandaloz”, ka shkruar Grenell.

Ai ka kritikuar gjithashtu funksionimin e gjykatave ndërkombëtare, duke pretenduar se vendimmarrja në raste të tilla ndikohet nga politika.

“Askush nuk është i sigurt nga këto gjykata ndërkombëtare, ku elitat akademike marrin vendime politike”, ka deklaruar ai.

Grenell ka drejtuar kritika edhe ndaj trupit gjykues dhe prokurorisë, ndërsa ka përmendur në mënyrë të veçantë gjyqtarin zviceran Guénaël Mettraux.

“Gjyqtari zviceran Guenael Mettraux ishte udhëheqësi i vërtetë, duke injoruar çështjet ligjore dhe duke zgjedhur në vend të tyre politikën e Jack Smithit”, ka shkruar Grenell.

Në reagimin e tij, ish-emisari amerikan ka kërkuar edhe ndërprerjen e financimit për gjykata të tilla, duke iu drejtuar Departamentit amerikan të Drejtësisë dhe Todd Blanche.

“Të gjitha këtyre gjykatave duhet t’u ndërpritet menjëherë financimi. Departamenti i Drejtësisë dhe Todd Blanche duhet të veprojnë shpejt. Amerikanët po paguajnë për këto ndjekje politike dhe kjo duhet të ndalet”, ka shkruar ai.

Në fund të reagimit, Grenell i është drejtuar kryeministrit të Kosovës, Albin Kurti, dhe deputetëve të Kuvendit, duke kërkuar ndërmarrjen e hapave për shpërbërjen e Gjykatës Speciale.

“Albin Kurti gjithashtu duhet të veprojë shpejt për ta shpërbërë këtë Gjykatë të huaj. Anëtarët e Parlamentit duhet të punojnë me Kurtin që kjo të ndodhë. Kosovës nuk i duhet një gjykatë në Holandë”, ka përfunduar Grenell.

Deklaratat e Grenellit përfaqësojnë qëndrimin e tij personal lidhur me aktgjykimin dhe funksionimin e Gjykatës Speciale, ndërsa pretendimet e tij për procesin gjyqësor nuk paraqiten si konstatime të gjykatës.