Presidenti i Shteteve të Bashkuara, Donald Trump, ka mohuar kategorikisht një raport të publikuar nga agjencia e lajmeve Axios, sipas të cilit administrata amerikane kishte shqyrtuar mundësinë e lehtësimit të sanksioneve ndaj Iranit dhe lirimin e fondeve të ngrira iraniane në këmbim të hapave konkretë lidhur me programin bërthamor të Teheranit.

Në një reagim në platformën e tij Truth Social, Trump e cilësoi lajmin si të rremë dhe deklaroi se nuk ka bërë asnjë ofertë të tillë ndaj Iranit.
“Axios sapo publikoi një lajm se ‘Trump’ i ofroi Iranit lehtësim nga sanksionet dhe fonde të ngrira. Kjo është e pavërtetë. Unë nuk u ofrova atyre ASGJË!”, shkroi presidenti amerikan.

Raporti i Axios, duke cituar zyrtarë amerikanë të paidentifikuar, pretendonte se Trump ishte i gatshëm të ofronte lehtësim ekonomik dhe të zhbllokonte fondet iraniane në këmbim të angazhimeve konkrete nga Teherani për programin e tij bërthamor.

Trump e hodhi poshtë këtë pretendim, duke e përshkruar artikullin si “një mashtrim” dhe duke kërkuar që media ta tërheqë atë.
Deklaratat e presidentit amerikan vijnë në një moment kur përpjekjet diplomatike mes Uashingtonit dhe Teheranit mbeten në qendër të vëmendjes ndërkombëtare.

Ministri i Jashtëm i Iranit, Abbas Araghchi, ishte planifikuar të zhvillonte takime me ndërmjetësuesit e Katarit në Nju Jork, ndërsa zyrtarë amerikanë dhe iranianë kanë zhvilluar kontakte gjatë javës së kaluar në margjinat e Asamblesë së Përgjithshme të Kombeve të Bashkuara.

Megjithatë, agjencia shtetërore iraniane e lajmeve IRNA raportoi të hënën se Teherani nuk ka planifikuar bisedime të mëtejshme të drejtpërdrejta me Shtetet e Bashkuara.

Tensionet mbeten të larta edhe për shkak të situatës në Ngushticën e Hormuzit, një nga arteriet më të rëndësishme për tregtinë globale të energjisë. Të shtunën, Trump refuzoi publikisht një propozim iranian për rihapjen e ngushticës, ndërsa një ditë më vonë deklaroi për Axios se pret rifillimin e bisedimeve në ditët në vijim.

Ngushtica e Hormuzit, përmes së cilës kalon rreth një e pesta e furnizimit botëror me naftë dhe gaz natyror të lëngshëm, ndodhet aktualisht në qendër të krizës rajonale. Sipas raportimeve, rruga strategjike detare është bllokuar në mënyrë efektive që nga përshkallëzimi i konfliktit pas sulmeve amerikane dhe izraelite kundër Iranit.

/rtsh.al/