Kombëtarja shqiptare U-15 ka regjistruar fitoren e katërt radhazi në FIFA U-15 World Cup & Festival 2026, që po zhvillohet në Azerbajxhan. Kuqezinjtë e drejtuar nga trajneri Armand Dama triumfuan me rezultatin e pastër 5-0 ndaj Vanuatus, duke vijuar me rezultate pozitive në këtë turne ndërkombëtar.

Shqipëria e zhbllokoi rezultatin në minutën e 11-të me Kledi Didën, ndërsa pesë minuta më vonë Santiago Perkola dyfishoi avantazhin. Dida ishte sërish protagonist në pjesën e mbetur të takimit, duke shënuar dy gola të tjerë në minutat 25 dhe 30, për të kompletuar tregolëshin e tij personal.

Golin e pestë dhe të fundit për kuqezinjtë e realizoi Elio Mera në minutën e 39-të, duke vulosur fitoren 5-0 të Shqipërisë U-15. Ky është suksesi i katërt radhazi për kuqezinjtë në këtë aktivitet, pas fitoreve ndaj Ishujve Turks dhe Kaikos (6-2), Mauritanisë (4-1) dhe Ruandës (4-0).

Shqipëria U-15 do të luajë ndeshjen e fundit të fazës së parë të turneut ndaj Bregut të Fildishtë, sot, në orën 17:00.