Qytetarët izraelitë i janë drejtuar kutive të votimit për zgjedhjet parlamentare, të cilat zhvillohen në një klimë të tensionuar politike dhe të sigurisë. Rezultati pritet të përcaktojë të ardhmen politike të kryeministrit Benjamin Netanyahu, mes pakënaqësive për luftërat e viteve të fundit dhe izolimit ndërkombëtar të Izraelit. Qendrat e votimit janë hapur për zgjedhjet e para parlamentare që nga sulmet e udhëhequra nga Hamasi më 7 tetor 2023, të cilat u pasuan nga lufta shkatërruese në Gaza dhe përshkallëzimi i konfliktit në rajon, përfshirë përballjen me Iranin.

Sondazhet parazgjedhore tregojnë se koalicioni i kryeministrit Benjamin Netanyahu mund të humbasë shumicën në Knesset, parlamentin izraelit me 120 vende. Megjithatë, edhe opozita rrezikon të mos sigurojë 61 mandatet e nevojshme për formimin e një qeverie të re, duke e bërë të pasigurt konfigurimin politik pas zgjedhjeve.

Për Netanyahun, këto zgjedhje konsiderohen një test vendimtar për të ardhmen e tij politike. Udhëheqja e tij është vënë në pikëpyetje pas sulmeve të 7 tetorit, ndërsa ai përballet gjithashtu me procese gjyqësore për korrupsion në tri çështje të veçanta. Kryeministri ka marrë mbështetje nga presidenti amerikan Donald Trump, i cili ka bërë thirrje për faljen e tij. Megjithatë, çështjet gjyqësore vijojnë të jenë në proces.

Zgjedhjet shihen gjerësisht si një referendum mbi mënyrën se si Netanyahu ka drejtuar vendin që nga sulmet e Hamasit, ku u vranë rreth 1,200 persona, shumica civilë. Operacionet ushtarake izraelite në Gaza kanë shkaktuar shkatërrime të mëdha dhe dhjetëra mijëra viktima palestineze. Sipas të dhënave të cituara në raportime, numri i të vrarëve ka arritur të paktën në 75 mijë.

/rtsh.al/