Projeksionet e para nga sondazhet e daljes nga votimi në Izrael tregojnë se blloku politik i udhëhequr nga sfiduesi Gadi Eisenkot ka dalë si grupi më i madh në parlament, duke lënë pas koalicionin qeverisës, por pa arritur të sigurojë pragu-kritik prej 61 vendesh për krijimin e shumicës. Pavarësisht kësaj zhvendosjeje të peshës elektorale, partia Likud e kryeministrit Benjamin Netanyahu parashikohet të mbetet forca më e madhe e vetme politike në Knesset.

Procesi i certifikimit përfundimtar mbetet në pritje të numërimit të votave specifike. Ndërsa publikimi i rezultateve zyrtare ka nisur në orët e mbrëmjes, rreth 600,000 fletëvotime në mungesë – pothuajse të gjitha nga ushtria – dhe rreth 10% e totalit të votava, nuk do të numërohen plotësisht deri të enjten.

Pas mbylljes së këtij procesi, Presidenti i Izraelit do të nisë konsultat zyrtare për t’i besuar mandatin e formimit të kabinetit figurës që mund të garantojë koalicionin, një proces që mund të zgjasë shumë javë.

I mbrojtur nga këto shifra, udhëheqësi i bllokut opozitar dhe partisë Yashar (“E Drejtë”), Gadi Eisenkot, e interpretoi rezultatin si një mesazh të qartë politik. Ish-shefi ushtarak deklaroi se projeksionet dëshmojnë “një ‘mungesë të plotë besimi’ tek Netanyahu dhe koalicioni i tij i krahut të djathtë”, duke shtuar se “do të veproj menjëherë për të zbatuar mandatin e popullit, për të zëvendësuar qeverinë e Netanyahut dhe për të formuar një qeveri sioniste të përkushtuar ndaj rekrutimit ushtarak sa më shpejt të jetë e mundur”.

Mbështetje këtij qëndrimi i dha edhe lideri i qendrës së majtë, Yair Golan, kreu i Demokratëve, i cili pohoi se publikut izraelit “ka shkarkuar qeverinë e Netanyahut”.

Duke e cilësuar këtë si një fitore për bllokun anti-Netanyahu, Golan nënvizoi gatishmërinë e tij për bisedime: “Jemi të gatshëm të punojmë me të gjithë partnerët tanë, të kapërcejmë boshllëqet dhe të marrim përgjegjësi. Publiku ka folur. Tani është radha jonë të bëjmë punën”.

Nga ana tjetër, atmosfera në shtabin e partisë Likud shfaqej më e përmbajtur dhe komplekse. Edhe pse blloku opozitar ka marrë më shumë vota si tërësi, mbështetësit e Netanyahut shprehin optimizëm për ruajtjen e ekzekutivit. “Koalicioni do të jetë shumë i fortë”, u shpreh Golan Tsukrel, një mbështetës i pranishëm në selinë e partisë.

Një zhvillim me peshë në këto zgjedhje është edhe performanca e përfaqësimit arab. “Partitë arabe-izraelite kanë fituar një numër rekord vendesh”, çka ka nxitur festime te mbështetësit e partisë Ra’am dhe drejtuesit të saj Mansour Abbas në Sakhnin. Në kushtet kur asnjë prej blloqeve të mëdha tradicionale nuk ka shumicën e nevojshme, kjo forcë politike mund të marrë një rol përcaktues në negociatat e ardhshme parlamentare.

/rtsh.al/