Bllokohet gjatë natës aksi Kamëz-Kashar, ARRSH njofton drejtuesit e mjeteve për kufizimet

Aktualitet | 18 minuta më parë

Autoriteti Rrugor Shqiptar ka njoftuar bllokimin e përkohshëm të qarkullimit në një segment të rrugës dytësore Tiranë-Durrës, për shkak të punimeve për montimin e trarëve të mbikalimit të Nyjes së Laknasit. Kufizimi do të nisë mbrëmjen e sotme (19 nëntor) dhe do të vijojë deri në orët e para të mëngjesit të 20 nëntorit.

Sipas njoftimit të ARRSH-së, bllokimi do të prekë segmentin nga Mbikalimi i Kamzës deri te Mbikalimi i Kasharit, në krahun e djathtë, në të dyja senset e lëvizjes.

Punimet do të kryhen në kuadër të projektit “Zgjerimi i Superstradës Tiranë-Durrës, Faza III” dhe do të zhvillohen gjatë orarit 22:00-05:00.

Autoriteti Rrugor Shqiptar bën me dije se kontraktori ka marrë masat e nevojshme për menaxhimin e trafikut, vendosjen e sinjalistikës së përkohshme dhe garantimin e sigurisë rrugore në zonën ku do të kryhen punimet.

Në njoftimin e tij, ARRSH u bën thirrje drejtuesve të automjeteve të planifikojnë paraprakisht lëvizjet, të tregojnë kujdes të shtuar dhe të respektojnë sinjalistikën e vendosur, si dhe udhëzimet e personelit përgjegjës për menaxhimin e trafikut.

“U bëjmë thirrje drejtuesve të mjeteve të planifikojnë paraprakisht itinerarin e tyre, të tregojnë kujdes të shtuar, të respektojnë sinjalistikën e përkohshme dhe udhëzimet e personelit përgjegjës për menaxhimin e trafikut”, thuhet në njoftimin e Autoritetit Rrugor Shqiptar.

/rtsh.al/


Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.

Të ngjashme