Shembet masivi i dheut në rrugën Qafë Buall-Krastë, bllokohet përkohësisht qarkullimi

Aktualitet | 20 minuta më parë

Rruga Qafë Buall-Krastë, që lidh Bulqizën me zonën e Martaneshit, është bllokuar gjatë ditës së sotme pas shembjes së një masivi të madh dheu dhe shkëmbinjsh pranë vendit të njohur si Ura e Luçanës.

Rrëshqitja e masivit ka shkaktuar ndërprerjen e plotë të qarkullimit në këtë aks rrugor 17 kilometra të gjatë, ndërsa disa automjete kanë mbetur të bllokuara në të dyja anët e zonës së shembjes.

Për hapjen e rrugës dhe rikthimin e qarkullimit në normalitet është angazhuar firma kontraktore që po kryen punimet në këtë segment. Pas ndërhyrjes, lëvizja e automjeteve është bërë e mundur sërish gjatë orëve të drekës.

Aksi Qafë Buall-Krastë po i nënshtrohet një investimi me vlerë rreth 11 milionë euro, që përfshin stabilizimin e skarpatave përmes vendosjes së rrjetave mbrojtëse dhe betonimit, si dhe asfaltimin e rrugës.

Ky projekt vjen në vijim të një investimi të mëparshëm që kishte në fokus zgjerimin e trasesë. Në total, vlera e dy tenderëve për rehabilitimin e rrugës që lidh Qafë Buallin me zonën e Martaneshit arrin në rreth 22 milionë euro.

/rtsh.al/


Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.

Të ngjashme