Në të gjithë vendin janë ende 6 vatra aktive zjarri, ndërsa 19 të tjera janë shuar gjatë 24 orëve të fundit.

Emergjencat e Mbrojtjes Civile raportuan se problematikë është situata e zjarrit në fshatin Shëngjin në bashkinë Mirditë, ku për shkak të terrenit të vështirë ndërhyja është tepër e vështirë.

Aktualisht zjarri po ndjek një sipërfaqe të madhe me kullotë, shkurre dhe pisha dhe nuk paraqet rrezik për banesat.

Gjithashtu, mbeten aktive vatrat e zjarrit në Surroj dhe Shishtavec, bashkia Kukës – Skuraj, bashkia Kurbin – Sopot, bashkia Delvinë dhe Luf, bashkia Pukë, por ato nuk përbëjnë rrezik për qytetarët dhe pronat.

Në operacionet e fundit për shuarjen e zjarreve janë angazhuar:

– 128 forca zjarrfikëse,

– 80 forca ushtarake,

– 17 efektivë të Policisë së Shtetit,

– 69 nga strukturat e emergjencave civile të pushtetit lokal,

– 14 punonjës të administratës së zonave të mbrojtura,

– 42 pjesëtarë të shërbimit pyjor, dhe

– 52 vullnetarë.

Gjithashtu, në operacion është përfshirë edhe helikopteri Cougar, duke ndihmuar strukturat operacionale në kontrollin dhe shuarjen e zjarreve.

/rtsh.al/