Policia ka vendosur në pranga një 37-vjeçar pasi ky i fundit ka kundërshtuar me forcë një prej punonjësve të policisë i cili më parë i vuri masë administrative për parkim të gabuar.

37-vjeçari pasi ka është njohur me gjobën ka kundërshtuar punonjësin e policisë dhe më pas është larguar.

Por largimi i tij nuk zgjati shumë pasi specialistët e Sektorit për Krimet e Rënda, Shkodër në bashkëpunim me shërbimet e Forcës së Posaçme “Shqiponja” dhe të Komisariatit të Malësi e Madhe vendosën në pranga 37-vjeçarin Vincens Sterkaj, banues në fshatin Dedaj.  

“Në qytetin e Koplikut, punonjësi i Policisë së Rendit ka konstatuar një automjet të parkuar në një vend që nuk lejohej, i cili pengonte qarkullimin e automjeteve të tjera. Gjatë ushtrimit të detyrës për venien e masës administrative sipas Kodit Rrugor, drejtuesi i automjetit, shtetasi V. S. ka kundërshtuar me forcë punonjësin e Policisë dhe është larguar. Pas kontrolleve nga Policia, shtetasi V. S. është kapur në banesën e tij”, thuhet në njoftimin e policisë.   

Ndërkaq, materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme, për veprat penale “Kundërshtimi i punonjësit të policisë së rendit publik” dhe “Mosbindja ndaj urdhrit të punonjësit të Policisë”.

/rtsh.al/