Një ngjarje e rëndë ka ndodhur në aksin rrugor Korçë – Bilisht, në një pikë karburanti. Sipas policisë, drejtuesi i mjetit së bashku me të birin kanë hyrë në pikën e karburantit për të furnizuar mjetin e tyre me gaz, por në momentin që mjeti po furnizohej, shoferi ka ndezur një cigare duke shkelur rëndë rregullat e furnizimit, e duke shkaktuar përfshirjen e mjetit nga flakët.

Kanë qenë persona të tjerë përfshi dhe punonjës të karburantit që e kanë shtyrë mjetin në anën tjetër të rrugës duke e hedhur në kanal për të shmangur kështu një ngjarje shumë më të rëndë.

Nga flakët janë përfshirë babë e bir të cilët janë dërguar me urgjencë në Spitalin Rajonal të Korçës.

Burime pranë këtij spitali bëjnë me dije se gjendja është e rëndë për shkak të djegieve të shumta. Policia ndodhet në vendin e ngjarjes dhe po heton për shkaqet e përfshirjes së mjetit nga flakët.

Gazetare: Eftjola Fili

/rtsh.al/