Dy qytetarë ranë pre e një grabitje nga dy adoleshentë mbrëmjen e kaluar në qendër të Tiranës, të cilët me një armë lodër u morrin paratë përmes kërcënimit.

Policia e Tiranës arriti që të arrestonte njërin prej adoleshentëve ndërsa shpalli në kërkim bashkëpunëtorin e tij, po adoleshent.

Sipas policisë, ngjarja u shënua rreth orës 03:20, kur dy të rinjtë  u morën paratë dhe sendet personale që ata kishin e më pas u larguan.

Fill pas njoftimit të Policisë, në bulevardin “Dëshmorët e Kombit” u kap njëri prej autorëve të dyshuar,  ndërsa vijon puna për kapjen e një 17-vjeçari tjetër.

Policia tha se, dy të miturit janë autorë të dyshuar edhe të vjedhjes së një shume parash, në një farmaci në rrugën “Asim Zeneli”.

Në cilësinë e provës materiale u sekuestruan shuma e parave, e dyshuar e vjedhur, pistoleta imituese, dhe biçikleta të cilën autorët kanë përdorur për tu larguar nga vendi i ngjarjes.

Sheshi “Skënderbej” prej ditësh është kthyer në vendin më të frekuentuar këto ditë, me krijimin e atmosferës së festave të fundvitit.

Gazetare: Flutura Tota

/rtsh.al/