Autoritetet sllovake kanë riklasifikuar atentatin ndaj kryeministrit Robert Fico dhe po e hetojnë atë si një sulm terrorist, jo si tentativë për vrasje, tha Prokuroria e Përgjithshme e Sllovakisë.

Fico është duke u rikuperuar nga dëmtimet e rënda që pësoi kur një person i armatosur e qëlloi me armë pas një takimi të qeverisë në qytetin Handlova në Sllovakinë qendrore më 15 maj.

Autori i dyshuar, i identifikuar nga mediat vendase si poeti 71-vjeçar Juraj Cintula, u akuzua për tentativë vrasjeje me paramendim dhe u la në paraburgim.

“Atentati është riklasifikuar” – i tha agjencisë franceze të lajmeve një zëdhënëse e zyrës së prokurorit të përgjithshëm. “Ne e njoftuam të dyshuarin se ngjarja është klasifikuar si sulmit terrorist” – shtoi ajo pa dhënë detaje të mëtejshme.

59-vjeçari Robert Fico kryeson një koalicion qeverisës trepartiak me partinë e tij populiste Smer.

Pas atentatit, ai iu nënshtrua dy ndërhyrjeve kirurgjikale në një spital të vendit ndërsa u u lejua të vazhdonte trajtimin mjekësor në shtëpinë e tij në kryeqytetin Bratislavë më 31 maj.

Gazetare: Vjollca Zharri

/rtsh.al/