Kina dhe Rusia, si aleate të vjetra të Koresë së Veriut, do të dërgojnë për një vizitë atje dy delegacione të nivelit të lartë. Vizita e konfirmuar nga të tre vendet vjen me rastin e festimeve për 70 vjetorin e përfundimit të Luftës Koreane.

Koreja e Veriut po përgatitet për festimet e 70-vjetorit të përfundimit të Luftës Koreane ndërkohë që Kina dhe Rusia do të dërgojnë delegacione të nivelit të lartë në vendin e izoluar.

Zyrtari i partisë komuniste kineze, Li Hongzhong do të jetë në krye të delegacionit zyrtar që do të vizitojë vendin këtë javë. Kjo do të jetë vizita e nivelit më të lartë që zhvillon Kina në Korenë e Veriut që prej pandemisë së covid 19.

Ndërsa vizita e delegacionit rus ka nisur më 25 korrik dhe do të zgjasë dy ditë siç njoftoi ministria e mbrojtjes ruse.

”Vizita do të ndihmojë në forcimin e lidhjeve ushtarake mes dy vendeve dhe do të jetë një hap i rëndësishëm në zhvillimin e bashkëpunimit mes dy vendeve” thuhej në deklaratën e ministrisë së mbrojtjes ruse.

Vizitat u konfirmuan edhe nga gazeta shtetërore e Koresë së Veriut, me rastin e festimeve për përfundimin e Luftës Koreane më 27 korrik, që ajo e quan ”Dita e Fitores”.

Gazetare Megi Mehilli

/RTSH/