Presidenti rus Vladimir Putin është vendosur të flasë në një samit global për herë të parë që kur grupi mercenar Wagner organizoi një kryengritje në qershor, njofton BBC.

Ai do të bashkohet me udhëheqësit nga Kina, India, Pakistani dhe katër vende të Azisë Qendrore për samitin e Organizatës së Bashkëpunimit të Shangait (SCO) të martën.

India po kryeson samitin këtë vit, i cili po zhvillohet vetëm dy javë pasi kryeministri indian Narendra Modi u prit nga presidenti amerikan Joe Biden për një vizitë shtetërore.

Siguria rajonale, ekonomia, siguria ushqimore, ndryshimet klimatike dhe Afganistani janë disa nga çështjet që pritet të diskutohen në takim.

Por më e rëndësishmja, SCO do të shërbejë si një platformë për Putinin për të treguar se ai është ende i mirëpritur dhe i dëgjuar në platformat globale, pavarësisht luftës në Ukrainë.

Kina, Rusia dhe katër vende të Azisë Qendrore formuan SCO-në në vitin 2001 si një kundërmasë për të kufizuar ndikimin e Perëndimit në rajon. India dhe Pakistani iu bashkuan grupit në vitin 2017.

Të gjitha shtetet anëtare të SCO-së, që përfshin gjithashtu Kazakistanin, Kirgistanin, Taxhikistanin dhe Uzbekistanin, ose kanë abstenuar ose nuk kanë votuar në favor të sanksioneve të OKB-së kundër Rusisë.

Do të jetë interesante të shihet nëse zoti Putin përdor platformën për t’i sinjalizuar botës se ai është ende i rëndësishëm dhe në udhëheqje.

( Marrë me shkurtime nga BBC )