Rusia ka ndërmarrë sulme ndaj qyteteve ukrainase gjatë natës, përfshi kryeqytetin Kiev dhe qytetin perëndimor të Lvivit që është pranë kufirit e Poloninë.

Administrata ushtarake e Kievit u shpreh se Moska sulmoi me dronë kryeqytetin në orët e para të së martës, duke paralajmëruar banorët që të shkonin në vendstrehime.

Administrata më pas bëri të ditur se mbrojtja ajrore e Kievit kishte gjurmuar dhe shkatërruar rreth 24 dronë të prodhuar në Iran.

Ky është sulmi i dytë me dronë i ndërmarrë ndaj Kievit që nga fillimi i muajit.

Në Lvivit, ndërkohë u godit dhe u përshi nga flakët një objekt i infrastrukturës së rëndësishme por nuk janë raportuar viktima apo të plagosur.

Më herët, kryebashkiaku i qytetit Andriy Sadovy raportoi shpërthime në Lviv në zonat rreth tij. 

Sirenat e alarmit ranë edhe në qytetin jugor të Zaporizhias i cili gjatë ditëve të fundit ka qenë shënjestër e sulmeve intensive të artilerisë ruse.

Në atë qytet nuk u raportua ndonjë dëm material apo në njerëz. Ndërkaq, forcat ukrainase goditën me dronë këtë të martë qytezën jugore të Nova Kahovkas që është e pushtuar nga rusët, ku autoritetet lokale të mbështetur nga Moska raportuan se janë plagosur tre persona.

Gazetare: Elda Pepa

/RTSH/