Presidenti i Ukrainës, Volodymyr Zelensky, po viziton Romën në Itali, ku do të takohet me liderët politikë dhe do të ketë një audiencë me Papa Françeskun.

“Një vizitë e rëndësishme për afrimin e fitores së Ukrainës!”, shkroi Zelensky në Twitter ndërsa zbarkoi në kryeqytetin italian. Ai do të takohet me kryeministren italian Giorgia Meloni, presidentin Sergio Mattarella dhe do të udhëtojë për në Vatikan më vonë të shtunën.

Papa Françesku ka thënë shpesh se Vatikani është i gatshëm të veprojë si ndërmjetës në konfliktin mes Rusisë dhe Ukrainës. Në fillim të këtij muaji, ai deklaroi se Vatikani po punonte për një plan paqeje për t’i dhënë fund luftës, duke thënë se misioni “nuk është ende publik. Kur të jetë publik, unë do të flas për të”.

Të shtunën do të jetë hera e parë që presidenti Zelensky dhe Papa Françesku takohen që kur Rusia pushtoi Ukrainën. Vizita vjen pasi Rusia kreu një valë të re sulmesh ajrore në Kiev dhe qytete të tjera të Ukrainës gjatë natës.

Tre persona u plagosën në qytetin jugor të Mykolaiv dhe në qytetin perëndimor të Khmelnytsky. Infrastruktura kritike, si dhe shtëpitë dhe ndërtesat qeveritare u goditën gjithashtu./ BBC

/rtsh.al/