Presidenti Volodymyr Zelensky ka folur me tone të ashpra pas shkarkimit të një zv.ministri, duke deklaruar se Ukraina nuk do e tolerojë korrupsionin, ndërsa paralajmëroi marrjen e vendimeve kyçe mbi ç’rrënjosjen e tij.

Shkarkimi i zv.ministrit erdhi pas akuzave për marrje ryshfeti. Presidenti Zelensky theksoi se nuk do të ketë më kthim pas për Ukrainën dhe se shkarkimi i zv.ministrit, identiteti i të cilit nuk është bërë ende me dije, duhet të jetë sinjal për këdo që shkel parimet e drejtësisë.

“Dua që kjo të jetë e qartë: nuk do të ketë më kthim në atë që ishte në të kaluarën, në mënyrën se si jetonin njerëz të ndryshëm pranë institucioneve shtetërore ose ata që e kaluan tërë jetën e tyre duke ndjekur një karrige. Dua që ky të jetë sinjali ynë për të gjithë ata, veprimet apo sjellja e të cilëve shkel parimin e drejtësisë”, tha Zelensky.

Ukraina ka pasur një histori të gjatë korrupsioni të shfrenuar dhe qeverisje të lëkundur, me Transparency International që e rendit korrupsionin e vendit në 122 nga 180 vende.

BE i ka bërë reformat kundër korrupsionit një nga kërkesat e saj kryesore për anëtarësimin e Ukrainës në bllok, pasi i dha Kievit statusin e kandidatit vitin e kaluar.

/rtsh.al/