Palestinezët kanë dënuar një vizitë në një vend të shenjtë të kontestuar në Jerusalem nga një ministër izraelit i ekstremit të djathtë si një “provokim të paprecedentë”.

Ministri i Sigurisë Kombëtare, Itamar Ben-Gvir, i cili ka bërë thirrje për një linjë më të ashpër ndaj palestinezëve, eci rreth vendit të rrethuar nga policia.

Pretendimet për vendin e shenjtë ndajnë ashpër Izraelin dhe Palestinezët, teksa tensionet janë rritur me ardhjen e qeverisë së re nacionaliste të Izraelit.

Vizita e Ben-Gvir ishte akti i tij i parë publik që kur qeveria, e udhëhequr nga kryeministri Benjamin Netanyahu, u betua pesë ditë më parë.

Vendi në majë të kodrës është vendi më i shenjtë në judaizëm dhe i treti më i shenjtë në Islam. Për hebrenjtë njihet si Mali i Tempullit, vendi i dy tempujve biblikë dhe për myslimanët si Haram al-Sharif, vendi i ngjitjes së Muhamedit në Parajsë. I gjithë kompleksi konsiderohet të jetë xhamia al-Aksa nga myslimanët.

Hebrenjtë dhe jomyslimanët e tjerë lejohen të shkojnë në kompleks, por jo të falen, megjithëse palestinezët i shohin vizitat e hebrenjve si përpjekje për të ndryshuar status quo-në delikate./ BBC

/rtsh.al/