Ministri i Jashtëm rus paralajmëroi sërish sot Ukrainën se duhet të çmilitarizohet, duke kërcënuar me veprime të mëtejshme ushtarake, si dhe duke akuzuar në mënyrë të rreme Kievin dhe Perëndimin për nxitjen e luftës që filloi me pushtimin nga ana e Moskës.

Sergej Lavrov tha se Ukraina duhet të heqë dorë nga çdo kërcënim ushtarak ndaj Rusisë  përndryshe “ushtria ruse do ta zgjidhë vetë çështjen”. Komentet e tij pasqyruan pretendimet e vazhdueshme e të pabaza nga Kremlini se Ukraina dhe aleatët e saj perëndimorë ishin përgjegjës për luftën 10-mujore, e cila ka vrarë dhjetëra mijëra njerëz, si dhe ka zhvendosur miliona të tjerë.

Rusia nisi luftën më 24 shkurt, duke pretenduar një kërcënim për sigurinë e saj dhe një komplot për ta sjellë NATO-n në kufijtë e saj. 

Lavrov përsëriti sot se Perëndimi po ushqente luftën në Ukrainë për të dobësuar Rusinë dhe tha se varet nga Kievi dhe Uashingtoni se sa do të zgjasë konflikti.

“Sa i përket kohëzgjatjes së konfliktit, topi është në anën e regjimit (Kiev) dhe të Uashingtonit që qëndron pas shpinës së tij”,- tha Lavrov për agjencinë shtetërore të lajmeve Tass. “Ata mund ta ndalojnë rezistencën e pakuptimtë në çdo moment.”

Në një reagim të tijin, këshilltari presidencial ukrainas Mykhailo Podolyak shkroi në Tëitter se “Rusia duhet të përballet me realitetin”.

“As mobilizimi total, as kërkimi i panikut për municione, as kontratat sekrete me Iranin, as kërcënimet e Lavrov nuk do të ndihmojnë,”- tha ai. “Ukraina do ta çmilitarizojë deri në fund Federatën Ruse, do të dëbojë pushtuesit nga të gjitha territoret e okupuara. Prisni finalen në heshtje…”

Një ditë më parë, Ministri i Jashtëm i Ukrainës Dmytro Kuleba i tha Associated Press se qeveria e tij dëshiron një samit për t’i dhënë fund luftës, por ai nuk parashikon që Rusia të marrë pjesë në këtë samit. Apnews

/rtsh.al/