Policia kanadeze rrethoi një rezidencë në një rezervat indigjen, ku dyshohet se fshihet një prej autorëve që sulmuan me thikë, duke vrarë 10 persona.  Autoritetet paralajmëruan njerëzit në zonë se i dyshuari mund të ishte në atë zonë. Policia lëshoi një alarm urgjent në telefona, duke u kërkuar njerëzve të strehoheshin në shtëpitë e tyre. Ajo deklaroi se i dyshuari, Myles Sanderson, mund të ishte parë në rezervatin James Smith Cree First Nation.

Një reporter i Associated Press dëgjoi njerëz që bërtisnin dhe vraponin. Ai pa dhe policinë të rrethonte një shtëpi, duke bllokuar rrugët që të çonin në rezervat. Një zyrtar i njohur me këtë çështje tha se nuk është konfirmuar nëse Myles Sanderson është brenda, por alarmi u dha si një masë paraprake për sigurinë e banorëve.

Zyrtari foli në kushte anonimiteti, pasi ata nuk ishin të autorizuar për ta diskutuar çështjen publikisht. Vëllezërit akuzohen për vrasjen e 10 personave dhe plagosjen e 18 të tjerëve në sulmet e fundjavës. Vëllai i të arratisurit, Damien Sanderson, 31 vjeç, u gjet i vdekur të hënën pranë vendit ku kreu krimin. Policia po heton nëse Myles Sanderson, 30 vjeç, vrau edhe vëllain e tij.

Udhëheqësit e James Smith Cree Nation, ku ndodhën shumica e sulmeve me thikë, fajësuan për vrasjet abuzimin me drogën dhe alkoolin që po rrënonte komunitetin. Apnews

/rtsh.al/