Presidenti francez Emmanuel Macron tha të enjten se ai do të vazhdojë të dialogojë me Rusinë për të ndihmuar në parandalimin e përshkallëzimit të konfliktit në Ukrainë, por premtoi mbështetjen e palëkundur të Francës për Kievin në atë që ai tha se do të ishte një luftë e gjatë.

Macron në të kaluarën është kritikuar nga Ukraina dhe aleatët e Evropës Lindore për atë që ata e perceptuan si mbështetjen e tij të paqartë për Kievin që nga pushtimi i Rusisë ndaj fqinjit të saj dhe dialogun e tij të përsëritur me presidentin rus Vladimir Putin.

“Ne duhet të përgatitemi për një luftë të gjatë,” i tha Emmanuel Macron trupit të tij diplomatik duke përcaktuar qëllimet e tij të politikës së jashtme.

Ai tha se Franca do të vazhdojë mbështetjen afatgjatë për Kievin ekonomikisht, ushtarakisht dhe me ndihmën humanitare, por paralajmëroi se një nga sfidat kryesore do të ishte sigurimi i unitetit evropian përballë Rusisë.

“Uniteti evropian është kyç sepse ndarja është një nga objektivat e luftës së Rusisë,” tha ai.

Macron këmbënguli se biseda me Moskën ishte e domosdoshme për të shmangur përshkallëzimin e konfliktit dhe përfundimisht për të ndihmuar në vendosjen e kushteve për një paqe të negociuar, të cilën vetëm Ukraina mund ta vendosë.

Franca do të vazhdojë të bisedojë me Rusinë. tha ai. “Kush dëshiron që Turqia të jetë e vetmja fuqi në botë që vazhdon të bisedojë me Rusinë?”

rtsh.al/