Moska fajësoi edhe një herë Perëndimin për reduktimin e eksporteve të gazit rus në Evropë, ku një zëdhënës i Kremlinit deklaroi sot se “nuk ka asnjë pengesë” përveç problemeve teknologjike të shkaktuara nga sanksionet.

Deklarata, e cila vjen vetëm një ditë pas një tjetër ndërprerjeje të planifikuar për shkak të punëve të mirëmbajtjes, përkoi gjithashtu me njoftimin e Engie të Francës, e cila sot zbuloi se ishte informuar nga Gazprom për një reduktim të mëtejshëm dhe të menjëhershëm të dërgesave të gazit natyror, për shkak të një mosmarrëveshjeje të palëve për zbatimin e kontratave.

Franca akuzoi Moskën për përdorimin e furnizimeve me energji si një armë lufte. Gazprom ka njoftuar se do të mbyllë tubacionin për tre ditë në mënyrë që të kryejë punë të mirëmbajtjes.

Zëdhënësi i Kremlinit Dmitry Peskov, i pyetur nëse ka ndonjë garanci që Gazprom të rifillojë dërgimin e gazit përmes Nord Stream 1 pas punimeve të mirëmbajtjes u shpreh: “Ka garanci se përveç problemeve teknologjike të shkaktuara nga sanksionet, asgjë nuk e pengon furnizimin”, u përgjigj ai.

“Vendet evropiane, Kanadaja, SHBA-të, Britania kanë vendosur sanksione ndaj Federatës Ruse, të cilat nuk lejojnë kryerjen e punëve normale të mirëmbajtjes dhe riparimit, si dhe nuk lejojnë regjistrimin ligjor të kthimit të pjesëve dhe makinerive në ambientet e tyre. Nuk ka më pengesa të tjera që Rusia të përmbushë detyrimet e saj“, tha ai./CNN.gr

/rtsh.al/