Ministrat e energjisë të BE-së kanë rënë dakord që vendet e tyre të reduktojnë përdorimin e gazit, për t’u përgatitur në rast se Rusia ndalon furnizimet.

Pas bisedimeve të martën, anëtarët e BE ranë dakord që vendet duhet të reduktojnë vullnetarisht përdorimin e gazit me 15% nga gushti në mars.

“Ky nuk ishte një mision i pamundur!”, shkroi në Twitter Republika Çeke, e cila mban presidencën e radhës së BE-së.

“Qëllimi i reduktimit të kërkesës për gaz është që të bëhen kursime përpara dimrit në mënyrë që të përgatiten për ndërprerje të mundshme të furnizimit me gaz nga Rusia, e cila vazhdimisht përdor furnizimet me energji si armë“, tha BE.

Marrëveshja thotë se reduktimi i kërkesës për gaz do të bëhet i detyrueshëm nëse furnizimet arrijnë nivelet e krizës. Megjithatë, BE tha se disa vende që nuk janë të lidhura me linjat e tubacioneve të gazit të vendeve të tjera anëtare do të përjashtohen nga çdo urdhër i detyrueshëm i reduktimit të gazit pasi nuk do të jenë në gjendje të marrin furnizime alternative.

Shtetet të cilat nuk janë të lidhura me sistemin evropian të energjisë elektrike dhe që varen shumë nga gazi për prodhimin e energjisë elektrike janë gjithashtu të përjashtuara, tha BE, në mënyrë që të shmanget rreziku i një krize të furnizimit me energji elektrike.

Vendet gjithashtu mund të kërkojnë lehtësimin e rregullave nëse tejkalojnë objektivat e mbushjes së ruajtjes së gazit, nëse varen shumë nga gazi për industritë “kritike”, ose nëse konsumi i tyre i gazit është rritur me të paktën 8% në vitin e kaluar krahasuar me mesataren të pesë viteve të fundit.

Marrëveshja vjen pasi firma ruse e energjisë Gazprom njoftoi se kishte reduktuar edhe një herë rrjedhat e gazit në Gjermani për të lejuar punën në një turbinë në tubacionin Nord Stream 1.

Gazprom ka shkurtuar plotësisht furnizimin me gaz për Bullgarinë, Danimarkën, Finlandën, Holandën dhe Poloninë për shkak të refuzimit të tyre për të përmbushur një urdhër të Kremlinit për të paguar faturat e tyre në rubla, në vend të eurove ose dollarëve./ BBC

/rtsh.al/