Një zyrtar amerikan ka paralajmëruar se Koreja e Veriut mund të kryejë testin e shtatë bërthamor “në çdo kohë”, njofton BBC.

Sung Kim, Përfaqësuesi Special i SHBA-së në Korenë e Veriut, bëri paralajmërimin disa ditë pasi Pheniani testoi tetë raketa balistike rekord të dielën.

Çdo provë e tillë bërthamore do të përballej me një “përgjigje të shpejtë dhe të fuqishme”, u tha gazetarëve Zëvendës Sekretarja e Shtetit e SHBA, Wendy Sherman.

Pheniani nuk ka kryer një provë bërthamore për pesë vjet.

Megjithatë, tensionet janë rritur në gadishullin Korean. Duke folur nga Xhakarta, Kim tha se Koreja e Veriut kishte testuar një numër të paprecedentë raketash këtë vit – 31 krahasuar me 25 gjatë gjithë vitit të fundit rekord 2019.

“Dhe është vetëm qershori,” u tha ai gazetarëve gjatë një konference në Xhakarta, Indonezi.

Ai shtoi se retorika e përdorur nga zyrtarët e Koresë së Veriut kishte sugjeruar një gatishmëri për të përdorur gjithashtu armë taktike ose bërthamore të përmasave të vogla.

Kur u pyet nga gazetarët se kur do të zhvillohej raundi tjetër i testimit, Kim paralajmëroi se mund të ndodhë “në çdo kohë” – duke përfshirë edhe këtë javë, sipas gazetës Bloomberg.

Ndërkohë, zonja Sherman u tha gazetarëve në Seul – ku ajo ka qenë duke u takuar me zyrtarë të Koresë së Jugut dhe japonez – se çdo test i tillë “do të ishte në kundërshtim të plotë me rezolutat e Këshillit të Sigurimit të OKB-së”.

“Unë besoj se jo vetëm ROK (Koreja e Jugut) dhe Shtetet e Bashkuara dhe Japonia, por e gjithë bota do të përgjigjen në një mënyrë të fortë dhe të qartë,” tha ajo.

Koreja e Veriut ende nuk i është përgjigjur pohimeve të SHBA. (Sipas BBC)